இயக்கப் பெயர் : கடற்கரும்புலி நிலா *சொந்தப் பெயர் : சந்திரசேகரம் துஷிதராதேவி *நிலை : கடற்கரும்புலி *பிறந்த திகதி : 26.11.1982 *வீரச்சாவு : 01.04.2009 *தற்காலிக முகவரி : முள்ளியவளை முல்லைத்தீவு **சொந்த முகவரி : மாகாறம்பைக்குளம்,வவுனியா **சம்பவம் :முல்லை மாவட்டம், சாளைப்பகுதியில் சிறிலங்காப் படையினர் மீது கரும்புலித் தாக்குதலை மேற்கொண்டு வீரச்சாவைத் தழுவிக்கொண்டார் .

நிலவளமும் நீர்வளமும் நிறைந்த வவுனியா மண்ணில் சந்திரசேகரம் தேவகி இணையரின் அன்புமகளாய் பிறந்த துஷிதராதேவி தமிழீழ மண்ணில் பெரும் வரலாற்றைப் படைக்கப் போகிறாள் என்று அப்போது யாரும் அறிந்திருக்கவில்லை.

மெல்லிய தோற்றமும், மென்மையான பேச்சும், அனைவரையும் அரவணைத்து நேசிக்கின்ற குணமும், மற்றவர் துயர்கண்டு துடிக்கின்ற இயல்பும் கொண்டிருந்த அவள் தன்னுடைய சிறுவயதிலேயே அரச பயங்கரவாதத்தின் கொடுமைகளை பார்த்து வளர்ந்தாள்.
வவுனியா மண்ணில் சிறிலங்கா அரச பேரினவாதத்தின் நெருக்குதல்கள் தீவிரமடைய, முல்லைத்தீவு முள்ளியவளையில் அவளது குடும்பம் இடம்பெயர்ந்து வாழத்  தொடங்கியது. அங்கு முள்ளியவளை வித்தியானந்தாக் கல்லூரியில் தனது கல்வியைத் தொடர்ந்த துஷிதராதேவிக்குள் விடுதலையுணர்வு மெல்ல மெல்ல அரும்பத் தொடங்கியது. 

அன்றைய காலத்தின் தேவையை உணர்ந்தவளாய், தமிழீழ மண்ணின் விடுதலைக்காக தமிழ்மக்களின் நிம்மதியான வாழ்வுக்காக 1995 இன் இறுதிப்பகுதியில் தன்னையும் விடுதலைப் போராட்டத்தில் இணைத்து நிலா என்ற பெயரோடு போராளியாய்த் தலைநிமிர்ந்தாள்.

படையத் தொடக்கப் பயிற்சிகளில் அவள் காட்டிய திறனும்இ வேகமும் சிறுத்தையணிக்கு அவள் தேர்வு செய்யக் காரணமாகின. 
சிறுத்தைப் படையணியில் சிறப்புப் பயிற்சிகள் அனைத்தையும் மிக நேர்த்தியாகச் செய்து முடித்த நிலா, போரியலின் தேவைகருதி 1997 ஆம் ஆண்டு மேஜர் சோதியா படையணிக்கு அனுப்பப்பட்ட போராளிகளில் ஒருத்தியானாள்.
அங்கு, ஜெயசிக்குறுய் எதிர்ச்சமர், ஓயாதஅலைகள்-3 இன் பரந்த சமர்க்களம் எங்கும் அவளின் போர்த்திறன் வெளிப்பட்டது. ஆனையிறவு படைத்தள மீட்புக்குப் பின்னர் விடுதலைப் புலிகளின் போர்த்திறனை, உலகம் எங்கும் வியந்து பார்க்கத் தொடங்கியிருந்தது. 

போரியலில் பெரும் தோல்வியை எதிர்கொண்ட சிறிலங்கா அரசு, எப்படியாவது ஆனையிறவு படைத்தளத்தை மீளவும் வல்வளைப்பு செய்துவிட வேண்டும் என்ற முனைப்பொடு படைத்துறையின் பலம் முழுவதையும் ஒன்று திரட்டி, 25.04.2001அன்று தீச்சுவாலை என்ற பெயரில் பெரும் படைநடவடிக்கை ஒன்றைத் தொடக்கியது.
உலகம் உற்று நோக்க, வந்த படைகளை எதிர் கொண்டு விடுதலைப் புலிகளின் படையணிகள் தீரமுடன் போரிட்டு எதிரியின் கனவைத் தீக்கிரையாக்கின. இந்தக்களத்தில் மிகச் சிறப்பாக, ஓர்மத்தோடு நின்று எதிரிகளோடு சமரிட்ட நிலா தலையில் பெரும் விழுப்புண்ணைத் தாங்கிக் கொள்கிறாள்.

அந்த விழுப்புண்ணின் தாக்கத்தால் அவளது ஒரு கண்ணின் பார்வைத்திறன் மாலைநேரத்துக்குப் பின் குறைவடையத் தொடங்கியது. அதனால் மருத்துவ ஓய்வின் பின்னர்  மருத்துவப் பிரிவிலேயே அவளது பணி தொடர்ந்தது. அங்கு அடிப்படை மருத்துவக் கல்வியைக்  கற்றுக்கொண்டு, விழுப்புண்தாங்கி வரும் போராளிகளையும், நோயுற்று வரும் போராளிகளையும் அன்போடு அரவணைத்து நேரம்தவறாது கண்காணித்து, அவர்களுக்குரிய மருத்துகளையும் கொடுத்து ஒருதாயைப்போல கவனித்தாள். கீர்த்திகா, ஒளிர், அல்பா என மருத்துவப் பாசறைகளின் நிர்வாகப் பணிகளையும் நேர்த்தியுறச் செய்தாள்.

மருத்துவப் பணியை செய்துகொண்டு, தான் கரும்புலியாகச் செல்ல வேண்டும் என்ற விருப்பத்தை தேசத் தலைவனுக்கு கடிதம் மூலம் எழுதி தெரியப்படுத்திய நிலா அதன் பதிலுக்காக நீண்டநாள் காத்திருந்தாள். 
2006 ஆம் ஆண்டு அவளைக் கடற்கரும்புலிகள் அணியில் இணைத்துக் கொள்வதாக தேசத் தலைவனிடம் இருந்து பதில் வந்தபோது பேருவகை கொண்டாள்.
கடற் கரும்புலிகளணிக்கு உள்வாங்கப்பட்ட நிலா கடற் கரும்புலிகளுக்கான பயிற்சிகளை பெற்றுக்கொண்டு தன் இலக்கிற்காக காத்திருக்கத் தொடங்கினாள். கறுப்பு வரிச் சீருடையில், தேசத்தலைவனுக்கு அருகிருந்து உணவுண்டு ஒளிப்படம் எடுத்து அகமகிழ்ந்தாள். 

2009 இன் கனதி நிறைந்த நாட்கள். சாளைப்பகுதியூடாக முன்னேறி வரும் சிறிலங்காப்படைகளை தடுத்து நிறுத்த நரிவலை என்ற பெயரில் எதிரி நகரும் வழியெங்கும் கரும்புலிகள் வலைவிரித்து காத்திருந்தனர். அந்த நடவடிக்கையில் நிலாவும் வெடிகுண்டோடு காத்திருந்தாள். 
சுட்டெரிக்கும் மணலில் நிலத்துக்கு கீழ் பரல் தாக்கப்பட்டு அதற்குள் வெடிகுண்டொடு அவள்.
அவளை சுற்றியெங்கும் பெரும் திரளான இராணுவத்தினர் வந்துவிட்டார்கள்  
நான் வெடிக்கிறேன், "புலிகளின் தாகம் தமிழீழத் தாயகம்’’ ஒலியலை தாங்கி வந்த அவளின் குரலோசை,  அவளின் வீரத்தை மட்டுமல்ல ஈகத்தையும் எமக்கு எடுத்தியம்பின. 

01.04.2009 அன்று சாளைப் பகுதியில் புதிய வரலாற்றை எழுதிச்சென்று காற்றோடு காற்றாய் கலந்துவிட்ட கடற்கரும்புலி நிலாவுக்கு வீரவணக்கத்தை செலுத்தி நிற்கின்றோம்.